छत्तीसगढ़ के माटी

ए छत्तीसगढ़ के माटी ए....।
पावन, मनभावन तोर अंगना ,
चित्रकूट,तीरथगढ़ तोर गहना ।
धन-धान्य भरे तोर कोरा म,
कोयला,लोहा के का कहना ।
ए जीवन-मरन  के साथी ए ।
ए छत्तीसगढ़ के माटी ए...।।
तोर पुरवइया चन्दन के खुशबू,
पानी तोर गंगाजल हे।
पबरित होगेन सब मइनखे ,
शिवनाथ,महानदी छलाछल हे।
एमन हमर जोत के बाती ए।।
ए छत्तीसगढ़ के माटी ए....।।
सोनाखान के वीरनारायण,
इही माटी मा जनमिस ।
गेंदसिंह,हनुमान वीर ह,
बिद्रोह के बिगुल बजाइस ।
अंग रेज के फाटिस छाती रे ।।
ए छत्तीसगढ़ के माटी ए...।।
नशामुक्ति अउ सत के पंथ ला,
बाबा घासीदास देखाइस।
छुआछूत अउ भेदभाव ल,
सुंदरलाल मिटाइस।
इही मन हमर थाती ए ।।
ए छत्तीसगढ़ के माटी ए....।।
डोंगरगढ़ म बिराजे बम्लेश्वरी मैया,
रतनपुर म महामाया हे ।
दंतेवाड़ा म दंतेश्वरी माता,
झलमला के गंगा मैया हे।
दामाखेड़ा कबीर के साखी ए ।।
ए छत्तीसगढ़ के माटी ए....।
  *****
स्वरचित - डॉ. दीक्षा चौबे
दुर्ग , छत्तीसगढ़
---------0--------