तीजहारिन तीजा जाबे , मइके के दुलार पाबे

भादो मास के तीसर  तिथि म मनाये जाथे हरितालिका तीज , जेमा अपन सुहाग ल अमर बनाये बर  सुहागिन मन  निर्जला उपास राखथे । हमर छत्तीसगढ़ म एला बड़ धूमधाम ले मनाये जाथे..ए हा मइके के मान के तिहार आय । भाई मन अपन शादीसुदा बहिनी  मन ल ससुराल ले लेवा के लेगथे , ऊंखर बर नवा लुगरा बिसाथे अउ सुघ्घर खवाथे पियाथे । तीजा के पहिली दिन दूज के करू भात खाये बर घरो घर नेवता परथे ।कका बड़ा सब्बो बलाथे , सब्बो बहिनी मन जुरथे , एक दूसरे के दुख सुख गोठियाथे अउ अब्बड़ सुख पाथें ।अपन मइके के अंगना के मोह कभू नई छुटय , जिंदगी के अतेक साल जिहा बिताये ओला कइसे भुला जाहि..अब्बड़ असन  सुरता , मया अउ दुलार के धागा म बंधाय रहिथे नारी के मन ह मइके संग...ओ धागा ल मजबूत करथे ए तिहार ह । तीजा के दिन निराहार रइके
ओहर अपन सुहाग के उम्मर के संग संग अपन परिवार के कल्यान बर तको संकर भगवान तीर प्रार्थना करथे । एखरे बर रेत के शिवलिंग बना के फूल के फुलहरा सजाथे अउ रात भर भजन कीर्तन करके भगबान के पूजा करथे बिहनिया ओ ला तरिया नदिया म सरोये जाथे ,तहां नवा लुगरा पहिन के उपास ला टोरथे । चौथ के दिन तको सब्बो नाते रिश्तेदार मन खाये बर बुलाथे अउ साड़ी  , चूड़ी बिंदी नईते पईसा भेंट करथे । मइके के अब्बड़ कन दुलार मया बटोर के तीजहारिन लहूटथे
अउ  राजी खुसी अपन परिवार के जिम्मेदारी निभाथे ।
ओखर अंचरा हर मइके ससुराल के असीस के फूल ले महकत रहय अउ  मन ह खुसी म गमकत रहय , संकर भगवान अपन किरपा बनाय रखय ।
*****
स्वरचित - डॉ. दीक्षा चौबे , दुर्ग , छत्तीसगढ़