छत्तीसगढी बयनगय रचना

काम के बात कहत  हंव , तेहर कान देके सुन ।
आजकल के जमाना म खुशामद करई हे बड़े गुन ।।

कामधाम  ला करे नहि आघु आघु करथें ।
साहब ल जान देथे तहां खर्राटा  ल भरथे ।
तेहर बुता करइया ह मुड़ी ला अपन धुन ।।
आजकल...
एती के बात ल ओती करथे अब्बड़ फायदा उठाथे ।
देर सबेर ड्यूटी आथे , आधा जुवार भाग जाथे ।
तें सिधवा हावस त सबके गारी ला सुन ।।
आजकल...
अब्बड़ बुता करथन कइके  डींग अब्बड़  मारथे।
चुप्पे चुप बुता करइया अडहा मूरख कहाथे ।
तरी तरी ले खा डारथे एमन ए लकड़ी के घुन ।।
आजकल ...
साहब मन के गोड़ छू छू के जिनगी इंखर तरगे ।
कहां ले कहां पहुंचगे तेहर एकेच जगहा सरबे ।
खुसामद अउ चमचागिरी सीख ले थोरकुन ।।
आजकल  के जमाना म खुसामद करई हे बड़े गुन ।।

स्वरचित -- डॉ. दीक्षा चौबे , दुर्ग , छत्तीसगढ़